छाँपमा सञ्चालित एकीकृत घुम्ती शिविरमा ४०१ जना लाभान्वित

कालीगण्डकी गाउँपालिका गाउँकार्यपालिकाको कार्यालयले वडा नं ६ मा आज आयोजना गरेको एकीकृत घुम्ती शिविरमा कुल ४०१ जना नागरिकहरुले सेवा लिनुभएको छ । २३० जनाको स्वास्थ्य परीक्षण क्षयरोगको स्क्रिनिङ्गको लागि एक्सरे, ६० जनाको पाठेघरको मुखको क्यान्सर परीक्षण (VIA), ७२ जनाको पशु सेवा अन्तर्गत पशुपन्छी चेक जाँच, औषधी उपचार, गोबर परीक्षण, २३ जनाको कृषि सेवा अन्तर्गत माटो परीक्षण, १६ जनालाई जेष्ठ नागरिक परिचय पत्र वितरण गरी कुल ४०१ जनालाई वडा नं ६ छाँप स्थित वडा कार्यालयबाट सेवा प्रदान गरिएको थियो ।

जनतर (JNTRA) नेपाल, यूनडिपी, गण्डकी प्रदेश सरकार र कालीगण्डकी गाउँपालिकाको संयुक्त आयोजनामा सञ्चालित शिविरमा क्षयरोग न्यूनिकरणको लागि खोजपडताल गर्न छातीको एक्सरे, खकार परीक्षण मार्फत AI प्रविधीको प्रयोग गरी बिरामी पत्ता लगाईएको थियो । २३० जनाको एक्सरे गर्दा संकास्पद १४ जनाको खकार परीक्षणमा ६ जनामा क्षयरोग पुष्टी भएकोछ ।

कार्यक्रमको प्रमुख अतिथि गाउँपालिका अध्यक्ष खिम बहादुर थापाले उद्घाटन कार्यक्रममा गाउँघरतिर क्षयरोगलाई लाज मानेर विरामीले समयमा नै उपचार गर्न नआउँदा पछी जटिल समस्या बन्ने हुँदा कोही व्यक्ति क्षयरोगबाट पीडित नहुनको लागि खोज पडताल र छातीको एक्सरे शिविरको आयोजना गरिएको जानकारी गराउनु भयो । साथै गाउँपालिकाको केन्द्रबाट प्राप्त हुने सेवालाई एकीकृत गरी जनतालाई घरदैलोबाट सेवा उपलब्ध गराउने कार्यक्रम क्रमश सबै वडामा सञ्चालन गर्ने गाउँपालिकाको नीति रहेको बताउनु भयो ।

उद्घाटन कार्यक्रममा गाउँपालिका उपाध्यक्ष साबित्रा कोइरला, वडा नं ६ को वडा सदस्य महादेव न्यौपाने, गण्डकी प्रदेश सरकार स्वास्थ्य निर्देशनालयका अधिकृतले स्वागत मन्तव्य राख्नु भएको थियो । कार्यक्रमको अध्यक्षता वडा नं ६ को वडा अध्यक्ष सुन्दर प्रसाद अधिकारीले गर्नुभएको थियो भने कार्यक्रमको सञ्चालन प्रमुख प्रशासकीय अधिकृत पर्शुराम उपाध्यायले गर्नु भएको थियो ।