औद्योगिक ग्राम सञ्चालन सम्बन्धी अन्तरक्रिया कार्यक्रम सम्पन्न

२०८२ वैखाख ३ गते बुधबार

उद्योग तथा पर्यटन मन्त्रालय गण्डकी प्रदेशको आयोजना तथा कालीगण्डकी गाउँपालिकाको समन्वयनमा बुधबार कालीगण्डकी गाउँपालिकाको सभाहलमा औद्योगिक ग्राम सञ्चालनका लागि अन्तरक्रिया कार्यक्रम सम्पन्न भएको छ ।

नेपाल सरकारले २०७७ कार्तिक २४ गतेबाट एक स्थानीय तह एक औद्योगिकग्राम घोषणा गर्दै आएको छ। मापदण्ड पुगेका हालसम्म १३० वटा पालिकाहरुमा सञ्चालन भएकोमा कालीगण्डकी गाउँपालिका पनि छनौट भएको थियो । कालीगण्डकी गाउँपालिकाले वडा नं. ५ र ६ भपेङ स्थित करिब १२२ रोपनी क्षेत्रफलको जग्गामा औद्योगिकग्राम सञ्चालनको लागि DPR लगाएत अन्य सूचक तथा पूर्वधारहरु पूरा गरी मन्त्रालयमा पेश गरेकोमा औद्योगिकग्राम निर्माणको लागि कालीगण्डकी गाउँपालिका छनौट भएको थियो । छनौट भएका औद्योगिकग्राममा पूर्वाधार निर्माणको लागि संघ, प्रदेश तथा स्थानीय सरकारबाट बजेट विनियोजन हुदै आएको छ ।

कार्यक्रमको प्रमुख अतिथी गाउँपालिका अध्यक्ष खिम बहादुर थापाले औद्योगिकग्राम निर्माणका लागि विस्तृत परियोजना प्रतिवेदन (DPR), वातावरणिय अध्ययन प्रतिवेदन लगायत अन्य सूचकहरु पूरा गरी वडा नं ५ र ६ भपेङमा संघ तथा प्रदेश सरकारबाट प्राप्त बजेटबाट रिटेन्सन वाल, प्रशासकीय भवन, क्यानटिङ, प्लट, खानेपानीको धारा, हाइटेन्सन लाइन निर्माण गरेको र आ.व. २०८०/८१ मा संघीय सरकारबाट प्राप्त रु १ करोडको बजेटबाट चालु आ.व.मा पूर्वाधार निर्माण सम्बन्धी काम सञ्चालन भैरहेको बताउनुभयो । औद्योगिक ग्राममा नागरिकहरुलाई रोजगार, वातावरण संरक्षण, आगलागी नियन्त्रण लगाएतका बहुउद्देश्यीय मूलक योजना पतिङ्गरबाट कम्पोष्ट मल बनाउने उद्योग सञ्चालन गर्ने योजना अगाडी बढाएको र फर्निचर व्यवसायीहरुले उद्योग सञ्चालनको लागि इच्छा देखाएको जानकारी गराउनु भयो ।

कार्यक्रमको अध्यक्षता ग्रहण गर्नुभएका उद्योग तथा पर्यटन मन्त्रालयका सचिव इन्द्र प्रसाद बस्यालले गाउँपालिकाको भपेङमा रहेको अद्योगिकग्राममा स्थानीय युवा उद्यमी, वैदेशिक रोजगारीबाट फर्किएकाहरुलाई लघु, घरेलु तथा साना उद्योग सञ्चालनको लागि प्रोत्साहन, उत्प्रेरणा तथा जानकारी गराउन तीनै तहका सरकारहरुको समन्वय आवश्यक परेको बताउनुभयो । विकासको मोडललाई पुर्नविचार गरी कृषिलाई एक मात्र आर्थिक विकासको माध्यम नबनाई अन्य उद्योगहरुलाई पनि विभिन्न कार्यक्रम मार्फत सम्बोधन गर्नुपर्ने आवश्यक रहेको कुरा उल्लेख गर्दै गण्डकी प्रदेशमा सञ्चालित २९ वटा औद्योगिक ग्राम मध्ये चालु आ.व.मा ४ वटा पालिकामा औद्योगिक ग्राम सञ्चालन कार्यक्रममा छनौट भएकोमा त्यस मध्ये कालीगण्डकी गाउँपालिका पनि छनौट भएको जानकारी गराउनु भयो ।

औद्योगिकग्राम कार्यक्रम सम्बन्धी कार्यविधी र यसको उद्देश्यको बारेमा मन्त्रालयका उसचिव महराज ढकालले प्रिजेन्टेसन प्रस्तुत गर्नुभएको थियो ।

अन्तरक्रिया कार्यक्रममा वडा नं ४ का वडा अध्यक्ष यादव प्रसाद पाण्डे, सब इन्जिनियर पूर्ण बहादुर रानाले आफ्नो प्रश्न तथा जानकारीहरु राख्नु भएको थियो । कार्यक्रमको सञ्चालन मन्त्रालयका शाखा अधिकृत सृजना सुवेदीले गर्नुभएको थियो ।