कृषि विकास योजना तथा रणनीतिको खाका तयार गर्दै कालीगण्डकी गाउँपालिका

कालीगण्डकी गाउँपालिकाले आगामी पाँच वर्षको लागि कृषि क्षेत्रको विकासको लागि आवधिक योजना निर्माणको तयारीमा जुटेको छ । हेफर इन्टरनेसनल नेपालको प्राविधिक एवं विज्ञहरुको सहयोगमा गाउँपालिका स्तरीय कृषि विकास योजना तथा रणनीति तर्जुमा गर्न लागिएको हो ।आज गाउँपालिकाको सभाहलमा आयोजित कार्यक्रममा कृषि, पशुपालन, वातावरण विज्ञ सहितको समूह र गाउँपालिकाको तर्फबाट अध्यक्ष, उपाध्यक्ष, वडा अध्यक्ष एवं कार्यापालिका सदस्य, विषयगत शाखा प्रमुखहरुको सक्रिय सहभागितामा गाउँपालिकाको कृषि क्षेत्रको सबल, दुर्बल, अवसर र चुनौतीको बारेमा विश्लेषण गरि छलफल तथा सुझाव संकलन गरिएको छ ।

कार्यक्रमलाई समापन गर्दै कार्यक्रम एवं गाउँपालकाका अध्यक्ष खिम बहादुर थापाले स्थानीय आवश्यकता, क्षमता र स्रोत साधनलाई मध्यनजर गर्दै कृषि विकास रणनीति बनाउन लागिएको र यसबाट कालीगण्डकीको उर्वर जमिनमा सक्रिय युवाहरुलाई परिचालन गराई कृषि उद्यमी बनाउने गाउँपालिकाको नीतिलाई साकार गर्ने कुरा उल्लेख गर्नु भयो । कार्यक्रममा परियोजनाको तर्फबाट पशुपालन विज्ञ डा अम्बर शाह, कृषि अर्थ विज्ञ डा. रामचन्द्र बास्ताकोटी, कृषि विज्ञ नगेन्द्र बास्ताकोटी, वातावरण विज्ञ अस्मिता नेपाल लगाएतको समूहले कार्यक्रमको सहजीकरण गर्नु भएको थियो भने कार्यक्रमको सञ्चालन परियोजना कोडिनेटर दीपक विश्वकर्माले गर्नुभएको थियो ।