कालीगण्डकीले पूरा गर्यो राष्ट्रिय पूर्णखोप निर्देशिका सुचकहरु

कालीगण्डकी गाउँपालिका स्याङ्जाले राष्ट्रिय पूर्ण खोप निर्देशिका बमोजिमका सुचकहरु पुरा गरेको अवसरमा आज एक औपचारीक कार्यक्रम आयोजना गरी पूर्ण खोपको सुनिश्चितता र दीगोपनाको लागि प्रतिबद्धता व्यक्त गरेकोछ । अभिभावक, स्वास्थ्यकर्मी, महिला सामुदायिक स्वास्थ्य स्वंयसेविका, जनप्रतिनिधी, राजनीतिकदलहरु, कर्मचारी, विद्यालयका प्रअ तथा शिक्षकहरुले पूर्ण खोपको दीगोपनाको लागि प्रतिबद्धता जाहेर गर्नुभएकोछ । गाउँपालिकाका उपाध्यक्ष साबित्रा कोइरालाको अध्यक्षतामा गाउँपालिकाको सभाहलमा सञ्चालित कार्यक्रममा स्वास्थ्य चौकी र वडा कार्यालयहरुलाई प्रमाण पत्र वितरण गरिएको थियो । गाउँपालिकामा रहेको १६ देखि २३ महिनासम्मका २४० जना बालबालिकाहरुलाई १५ महिनाको उमेर भित्र पाउनुपर्ने सबै खोप दिइसकेकोमा आगामी दिनहरुमा जन्मिने नवजात शिशुहरुलाई खोप नछुटाउने उद्देश्यका लागि पूर्ण खोपको दिगोपना सुनिश्चतता गर्न सबै जनाले साथ र सहयोग गर्नुपर्ने कुरा कार्यक्रमका वक्ताहरुले जानकारी गराउदै विद्यालयहरुमा नयाँ बालबालिका भर्ना गर्न आउँदा खोप कार्ड अनिवार्य गराउन कार्यपालिकाले निर्णय गरी लागू गराएमा खोप बाट बालबच्चा छुट्न सक्ने सम्भावना कम हुने र नेपाल सरकारले एउटा बालबालिकालाई १० प्रकारका खोपहरु उपलब्ध गराउदा करिब ७५ हजार रुपैया खर्च हुने कुराको जानकारी गराउनु भएको थियो ।

कार्यक्रममा स्वास्थ्य शाखा प्रमुख एक बहादुर थापा, प्रशासकीय अधिकृत टिका कुमारी क्षेत्री, ३ नं. वडा अध्यक्ष देवेन्द्र कुमार थापा, प्रदेश जनस्वास्थ्य कार्यालयकका कर्मचारी मनिष कुमार महतो, मनोविद् कपिल शर्माले मन्तव्य राख्नुभएको थियो भने कार्यक्रमको सञ्चालन पोषण सहजकर्ता निश्चल पाण्डेले गर्नु भएको थियो