कालीगण्डकी गाउँपालिकामा जिल्ला प्रशासन कार्यालयको अन्तरक्रिया कार्यक्रम सम्पन्न

कालीगण्डकी गाउँपालिकाको व्यवस्थापन तथा जिल्ला प्रशासन कार्यालय स्याङ्जाको आयोजनमा आज स्थानीय तहमा शान्ती सुरक्षा, सेवा प्रवाह सहजीकरण सम्बन्धी अन्तरक्रिया कार्यक्रम सम्पन्न भएको छ । गाउँपालिकाका अध्यक्ष खिम बहादुर थापाको अध्यक्षता मा सञ्चालित कार्यक्रममा जिल्ला समन्वय समितिका उपप्रमुख खड्क राज सुवेदी, जिल्ला प्रशासन कार्यालय स्याङ्जाका प्रमुख जिल्ला अधिकारी ईश्वरी प्रसाद अर्याल, सहायक प्रमुख जिल्ला अधिकारी दिपक पौडेल, जिल्ला प्रहरी कार्यालयका प्रहरी नायव उपरीक्षक हरि प्रसाद पौडेलको आतिथ्यता रहेको थियो । उपस्थित अतिथिहरुलाई गाउँपालिका उपाध्यक्ष साबित्रा कोइरालाले स्वागत मन्तव्यबाट स्वागत गर्दै कार्यक्रमको सफलताको शुभकामना दिनुभएको थियो ।

कार्यक्रममा जिल्ला प्रहरी कार्यालयका प्रहरी नायव उपरीक्षक हरी प्रसाद पौड्यालले नागरिकहरुको शान्ति सुरक्षा र अमनचयनको वातावरण कायम गर्न प्रहरी अनवरत रुपमा खटि कार्य गर्दै आएकोमा सबैले सकरात्मक तवरले हौसाला प्रदान गरेमा मनोबल वृद्धी हुने कुरा बताउनुभयो । अर्का वक्ता प्रमुख जिल्ला अधिकारी इश्वरी प्रसाद अर्यालयले संघ प्रदेश र स्थानीय सरकारबीच सहकार्य र समन्वयको भूमिका गराउन जिल्ला प्रशासन कार्यालयले निर्वाह गर्ने साथै विपत व्यवस्थापन, शान्ति सुरक्षा, कार्यालयको सेवा प्रवाह कार्यहरुमा नागरिकहरुलाई सहजिकरण गर्दै आएको जानकारी गराउनुभयो।

कार्यक्रमका प्रमुख अतिथि जिल्ला समन्वय समितिका उपप्रमुख खड्क राज सुवेदीले कालीगण्डकी गाउँपालिकाको कार्यसम्पादन नेपाल भरीमै उत्कृष्ट देखिएकोमा बधाई दिनुका साथै जिल्ला प्रशासन कार्यालयले प्रदान गर्ने सेवाहरुमा पालिकाले सहजीकरण गरेमा नागरिकहरुलाई दु:ख कम हुने कुरा बताउनु भयो ।

गाउँपालिकाका अध्यक्ष खिम बहादुर थापाले नागरिकता, राष्ट्रिय परिचय पत्र, राहदानी सम्बन्धी समस्या समयअनुसार नयाँ नयाँ किसिमका आइरहने र समयानुकुल व्यवहारिक बन्दै ऐन, कानुनहरु संशोधन गर्न पहल गर्नुपर्ने कुराको जानकारी गराउनु भयो । कार्यक्रममा वडा अध्यक्ष, वडा सचिव, प्रधानाध्यापक, कर्मचारीहरुले आफ्नो दैनिक कार्यसम्पदानमा आईपर्ने समस्याहरुको बारेमा जानकारी गराउनुभएको थियो ।

गाउँपालिकाको सभाहलमा सञ्चालित कार्यक्रममा प्रस्तुतिकरण सहायक प्रमुख जिल्ला अधिकारी दिपक पौडेलले गर्नुभएको थियो भने सञ्चालन गाउँपालिकाका प्रमुख प्रशासकीय अधिकृत पर्शुराम उपाध्यायले गर्नु भएको थियो ।