बालमैत्री, पोषणमैत्री आचरसंहिताको मस्यौदा तयार

कालीगण्डकी गाउँपालिका स्याङ्जाले आज एक दिने कार्यशाला कार्यक्रम आयोजना गरी बालमैत्री पोषणमैत्री स्थानीय शासन घोषणाको लागि आवश्यक मापदण्ड पुरा गर्न बालमैत्री पोषणमैत्री आचरसंहिताको मस्यौदा तयार गरेको छ । बालमैत्री स्थानीय शासनका सूचक मापनयोग्य सरलीकरण तथा बालमैत्री पोषणमैत्री आचर संहिता निर्माण कार्यशाला सम्बन्धी आज एक दिने औपचारीक कार्यक्रमक गरि मस्यौदा तयार भएको छ । उपस्थित विभिन्न क्षेत्रका व्यक्तिहरुलाई ४ वटा समूहमा विभाजन गरी एक आपसमा छलफल र मन्थन गरी मस्यौदा तयार गरिएको हो ।

कार्यक्रमको अध्यक्षता ग्रहण गर्नुभएका गाउँपालिकाका अध्यक्ष खिम बहादुर थापाले देशको सर्वाङ्गिण विकासको लागि आवश्यक दक्ष मानव संसाधन निर्माण गर्न बालमैत्री र पोषणमैत्री शासनयुक्त गाउँपालिकाले सहयोग गर्ने बताउनुभयो । वि.स. २०८३ सालसम्म कार्यक्रम सम्पन्न गरी बालमैत्री र पोषणमैत्री गाउँपालिका घोषणा गर्ने प्रतिबद्धता गरे पनि समय अगावै गर्न सबैलेआफ्नो आफ्नो जिम्मेवारी पुरा गर्नु पर्ने आवश्यक रहेको जानकारी गराउनुभयो । गाउँपालिका उपाध्यक्ष साबित्रा कोइरालाले बालमैत्रीका ५१ वटा सूचकहरु हासिल गर्न शिक्षक, कर्मचारी, जनप्रतिनिधी, बालसञ्जाल सबैले एक जुट भई समन्वय गरी कार्य गर्नुपर्ने आवश्यक रहेको बताउनुभयो । त्यस्तै कार्यक्रममा गाउँपालिकाका प्रमुख प्रशासकीय पर्शुराम उपाध्याय, शिक्षक भिम बहादुर थापा, वडा अध्यक्ष रुक बहादुर थापाले मनतव्य राख्नु भएको थियो ।

गाउँपालिकाको हलमा आयोजित कार्यक्रममा कार्यपालिका सदस्य, प्रध्यानाध्यापक, स्वास्थ्य कर्मी बालसञ्जालका सदस्य, खानेपानी समितिका प्रतिनिधी, संघ सस्थाका प्रतिनिधी शाखा प्रमुख गरी ६० जनाको सहभागिता रहेको थियो । कार्यक्रमको सञ्चालन बुद्धीसरा भण्डारीले र सहजीकरण विष्णु प्रसाद चौवैले गर्नु भएको थियो ।