कालीगण्डकीमा ड्रयागन फ्रुट सिजन सुरु: स्थानीय उपभोक्ता बगैंचामै फल किन्न उत्साहित
यो सालको वर्षा ऋतु सुरु भए सँगै कालीगण्डकी गाउँपालिकाले ड्रयागन फ्रुट बिक्री गर्न सुरु गरेको छ । नयाँ सिजन सुरु भए सँगै उत्पदान भएको ड्रागन फ्रुटको मूल्य बजारको माग र फलको गुणस्तर हेरी प्रति केजि रु ३०० देखि ३५० सम्मको बिक्री मूल्य तोकिएको छ । फल खरिद गर्न स्थानीय उपभोक्ताहरु बगैचामै गई ताजा फल खरिद गर्न थाल्नु भएको छ । तन्नरी र युवा पुस्ता रातम्मै फलेका ड्रागन फ्रुटको भिडियो र फोटो खिची सामाजिक सञ्जालहरुमा शेयर गर्दै रमाएका छन् ।
आ.व. २०७६/७७ को शसर्त अनुदान र गाउँपालिकाको लगानीमा सुरु गरेको ड्रागन फ्रुट खेती परियोजनाले वार्षिक १० लाखसम्मको फल तथा फूल बिक्री गरी गाउँपालिकाको आन्तरिक राजश्व वृद्धी गर्न सहयोग गरेको छ । उक्त खेती परियोजनाबाट ३ जनाले ज्यालादारीमा आधारित रोजगारी पाउनुभएको छ भने सिजन र काम अनुसार वर्षमा २० देखि २५ जना व्यक्तिहरुले आंशिक समय रोजगारी प्राप्त गर्नु भएको छ ।
वि.स २०७७ साल देखि कालीगण्डकी गाउँपालिका वडा नं ४ पुच्छारामा २४ रोपनी जमिन भाडामालिई खेती गर्न सुरु गरेको गाउँपालिकाले विगत ३ वर्ष देखि फल बिक्री गर्दै आएको छ । गाउँपालिकाले नागरिकहरुलाई फलफूल खेती प्रति आकर्षण गर्न नमुनाको रुपमा ड्रागन फ्रुटको बगैचा स्थापना गरी मागको आधारमा अनुदानमा बेर्ना र पिल्लर उपलब्ध गराउदै आएको छ । गाउँपालिकाबाट अनुदान प्राप्त गरी १४ जना कृषकहरुले यसको व्यवसायिक खेती सुरु गर्नु भएको छ ।
गत वर्ष पोखरा र बुटवलमा निर्यात गरि बिक्री गरि रु ८ लाखको फल र २ लाखको फूल बिक्री भएकोमा चालु वर्ष मौसम अनुकुल र बजार माग राम्रो भएमा गत वर्षको भन्दा अधिक आम्दानी गर्न सक्ने अनुमान कृषि शाखाले गरेको छ ।
गाउँपालिकाले उक्त परियोजनामा जमिनको घेराबार, स्टोर रुम, सिसि क्यामेरा, विजुली बत्ती, थोपा सिँचाई, पिल्लर लगाएतका स्थायी संरचना निर्माण गरेको छ ।
